Gabaw: Sumsing Sutgan Hte Shinggyim Masha

Chyum Laika: Tara jahprang 8:18; Mahte 6:19-21.

Mungkan hta masha hpan (2) nga ai. Dai gaw- (1) tawn shara nlu hkra lu su ai masha hâte (2) la hpa nnga hkra matsan ai masha ngu re. Anhte kadai mung matsan ai masha gaw nkam tai ai lu su mayu ai ni hkrai rai nga ai.

Karl Barth tsun ai mungkan ga gaw ayai aya byin nga sai ngu nna maram lu ai nga tsun ai. Mungkan lam myit ai masha law wa ai majaw re ngu hpe tsun da ai.

Karai Kasang gaw shinggyim masha hpe shi a hkrang bung sumla hte maren hpan da nna rapra ai hku hpanda ai raitim shinggyim masha a law hpa myit, tsadan a agung alau kata hta hkan nna Karai Kasang a hpanda ai hkrang hpe jahten kau sai.( ga shadawn:- Adam & Ewa )

Dai majaw-

1) Karai Kasang hte shinggyim masha daw hka mat ai

2) Shinggyim masha shada daw hka mat ai- dai ni a majaw nju ndawng, law hpa myit, rai dum ai ka-up mat nna tsawra myit ni gau ngwi yawm mat ai mungkan de du mat sai.

Ga shadawn:- WP mung hta byin nga ai majan gaw sut hpaga majan re. Myen asuya ni law hpa myit marin ai a majaw WP mungdan a manu dan ai nhprang ni mat sai, law hpa myit a majaw Majan byin hpyen yen law wa,tsawra myit n madun shinggyim nauna myit n madun tinggyeng lawhpa myit marin ai majaw rai nga ai.

Yesu Hkristu hpa hpe tsun sharin nga a ta?

:- Dinghta sutgan hkum mahkawng.

Rai yang gumhpraw ntam sana kun?

:- Tsun mayu ai gaw dinghta sutgan hta aten nma na matu aten hpe manu shadan nna sumsing sutgan hpe mahtang tam na matu rai nga ai. Law hpa myit sha rawng nga dingyang Sumsing sutgan mahkawng na yak nga ai.

Sumsing sutgan ngu kaning re ta?

Karai Kasang hpe sak jaw ai lam ni gaw sumsing sutgan teng teng rai nga ai. ( Malahki 3:10 )

Karai hpe jaw ai ngu gaw SHI matsan ai majaw i?

Ra ai majaw i?

Nrai nga ai. Anhte jaw bang ai lam ni gaw SHI a hpung shingkang hpe shadan shadawng na matu rai nga ai.

Gara hku sak jaw na ta?

1) Karai a magam gun ni ( yin la ai ga shaka )

2) hkamla lu ai chyeju hpe hti yu let sak jaw na ( htamshi, gawgap, laksan alu, chyeju dum alu… ni hte kaga ni)

3) Tinang ahkying aten hpe sak jaw na

Ga Dim: Kalang lang anhte tsun chye ga ai anhte tam ai ja gumhpraw gaw tinang kam ai kaw jai na matu rai nga ai le nga tsun chye ga ai.

Marku 10:17-21

Asak gaw Karai hte seng ai lam re anhte kadai mung jat la lu ai nre sutgan ngu gaw dai asak hpe njaw lu ai. Dai asak htum jang na a sutgan mung kaman sha rai sai.

Sara Sumlut Richard Nawng Seng
Uru Sengmaw Ginwang,
Seng Tawng Buga Hkalup Hpung, Hpakan.