WCC EC Chyum Laika Sharin Hpawng

Hkristu Ngu Ai Baw Hte Lam Shagu Hta

Kaba Rawt Wa Ga.

Rev. Langnaw Hawng Hkawng

Nawng Hkyi Buga Hkalup Hpung, Myitkyina

Ginwang.

Phone: +95 (0) 9400 0528 20

19 Aug 2017

Chyum Ga:

Ehpesu Ni Kaw Shagun Dat Ai Laika 4:15

Mahte A Laika 28:19,20

Shakawn Kungdawn Laika 133:1-3

Kasa Laika 1:8

Ga Nhpaw:

Hkristu a hkum hkrang rai nga ai nawku hpung a hpung magam gun hpung woi ni the hpung salang (EC) ni hte rau sha chyum mungga hpe jawm sharin hkam la lu ai majaw Karai Kasang a chyeju hpe na chying chyeju dum nngai law.

Ga Hkrang:

1. Nawku hpung ngu ai gaw hpa rai ta?

2. Nawku hpung a sasana bungli ni

Esaia Laika 55:6-11

Roma Ni Kaw Shagun Dat Ai Laika 10:8-17

Shaloi kaning rai tsun na law? Dai mungga gaw nang hte htep rai nga ai; dai gaw na a n-gup hte na a kraw lawang hta e rai nga ai: – dai gaw, anhte hkaw tsun dan ai kam sham ai hte seng ai mungga rai nga ai: –

⁹ shing rai, Yesu gaw Madu rai nga ai, nga nna na a n-gup ga hte tsun gara nna, Karai Kasang gaw si mat ai ni kaw na shi hpe hkrung sharawt la ai hpe, na a myit masin hta kam sham n yang gaw, nang hkye hkrang la ai hkrum na rin dai.

¹⁰ Kaning rai nme law, masha gaw ding hpring ai lu la hkra, myit masin hte kam sham nna, hkye hkrang la ai lu la hkra, n-gup hte tsun gara nga ai.

¹¹ Dai Chyum Laika mung, Shi hpe kam sham ai ni yawng mayawng hte gaw kaya kahpa n hkrum na ra ai, nga ai.

¹² Kaning rai nme law, Yuda ni hte Heleni masha ni hpe lachyen lahka n nga ai sha, dai Madu gaw yawng mayawng a ntsa na Madu langai sha rai nga ai rai nna, shi hpe shaga ai ni yawng mayawng hte hta chyeju hpring nga ai.

¹³ Shing rai dai Madu a amying nsang hpe shaga ai masha kadai mung, hkye hkrang la ai kaw du lu na ra ai.

¹⁴ Dai rai nna, garai n chye kam ai Madu hpe, kaning rai shaga lu na ma ta? garai n na yu ai wa hpe, kaning rai kam sham lu na ma ta? hkaw tsun dan ai wa n nga yang gaw, kaning rai na la lu na ma ta?

 ¹⁵ n shangun dat yang gaw, shanhte kaning rai hkaw tsun dan lu na ma ta? Dai hte maren, Mai kaja ai lam kabu gara shi ga hkaw tsun dan ai ni a sat lagaw ni gaw, gade wa tsawm nga ma lu hka! nga nna ka da nga ai.

¹⁶ Rai ti mung, nlang hte wa dai kabu gara shi ga hpe madat mara nga ma ai n rai. Kaning rai nme law, Esaia gaw, Madu e, anhte a shi ga hpe kadai wa kam sham nga a ta? nga nna tsun ai.

¹⁷ Dai rai nna, kam sham ai gaw na la lu ai kaw nna, na la lu ai mahtang gaw Hkristu a mungga a majaw pru wa ai.

3. Nawku hpung a magam bungli ni

Mahte A Laika 25:31-46

³¹ Dai Masha Kasha gaw shi a hpung shingkang dan hkung let, lamu kasa ni nlang hte rau sa du ai shaloi, shi a hpung shingkang a tingnyang ntsa e shi dung nna,

³² amyu baw shagu hpe shi a man e jahpawng tawn da nhtawm, sagu rem wa gaw sagu ni hte bainam ni hpe karan ginhka da ai zawn, shanhte hpe karan ginhka da nna,

³³ sagu ni hpe hkra maga de bainam ni hpe pai maga de tawn da na ma ru ai.

³⁴ Shaloi e dai Hkawhkam wa gaw shi a hkra maga de nga ai ni hpe Nye a Wa kaw na shaman ya lu la ai ni e, sa ma rit; ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu:

³⁵ kaning rai nme law, ngai kawsi jang nanhte ngai hpe sha na jaw myit dai: ngai hpang gara jang,nanhte ngai hpe lu na jaw myit dai: ngai manam tai hkawm yang, nanhte ngai hpe daw myit dai:

 ³⁶ singgu krin rai jang, nanhte ngai hpe jahpun myit dai: machyi hkrum jang, nanhte ngai hpe yu lajang myit dai: htawng rawng nga yang, nanhte ngai hpe kawan yu myit dai, ngu na mu ai.

³⁷ Shaloi ding hpring ai ni gaw,Madu e, nang kawsi ai hpe anhte galoi mu nna, galaw jaw ga ta? hpang gara ai hpe anhte galoi mu nna, lu na jaw ga ta?

³⁸ Nang manam tai hkawm ai hpe anhte galoi mu nna, daw ga ta? singgu krin rai nga ai hpe anhte galoi mu nna, jahpun ga ta?

³⁹ Nang machyi hkrum ai hte htawng rawng nga ai hpe, anhte galoi mu nna, nang hpe kawan yu ga ta? ngu nna shi hpe htan na ma ai.

⁴⁰ Dai rai nna hkawhkam wa gaw, Nanhte hpe ngai teng teng tsun ma de ga, Ndai ngai nau ni hta na kaji htum ai wa hpe nanhte galaw ai gaw, nanhte ngai hpe galaw ma nit dai, rai nga ai, ngu nna shanhte hpe htan na mu ai.

⁴¹Bai, pai maga de nga ai ni hpe, Dagam dala hkrum ai ni e, ngai hte hka wa nna nat gumlau hte shi a salung sala ni a matu lajang da ai n htum n mat ai wan de shang wa mu:

⁴² kaning rai nme law, ngai kawsi yang, nanhte ngai hpe sha na n jaw myit dai; hpang gara yang, nanhte ngai hpe la na n jaw myit dai:

⁴³ ngai manam tai hkawm yang, nanhte ngai hpe n daw myit dai; singgu krin rai jang, nanhte ngai hpe n jahpun myit dai: machyi hkrum ai hte htawng rawng nga yang, nanhte ngai hpe n yu lajang myit dai, ngu na mu ai.

⁴⁴ Shaloi shanhte mung, Madu e, nang kawsi ai, hpang gara ai, manam tai hkawm ai, singgu krin re ai, machyi hkrum ai hte htawng e nga ai hpe, anhte galoi mu nna, nang hpe n galaw daw ga ta? ngu nna htan na mu ai.

⁴⁵ Dai rai nna, Ngai nanhte hpe teng teng tsun ma de ga, Ndai ni hta na kaji htum ai wa hpe nanhte n galaw myit dai majaw, ngai hpe n galaw myit dai rai nga ai, ngu nna shanhte hpe htan na mu ai.

 ⁴⁶ Shaloi shanhte gaw n htum n wai ari de shang wa na ma ra ai; ding hpring ai ni mahtang n htum n wai asak de shang lu na ma ra ai, ngu wu ai.

4. Nawku hpung a hkan sa tara ni (Gaw Da Tara)

• Karai Kasang a tsawra myit hte (Yawhan 3:16)

¹⁶ Kaning rai nme law, Karai Kasang a Kasha hpe kam sham ai ni nlang hte gaw, hten bya n hkrum ai sha, htani htana asak lu la mu ga nga, Karai Kasang gaw shi a Kasha shingtai hpe jaw kau ai kaw du hkra, mungkan ga hpe tsaw ra wu ai.

• Karai Kasang a tengman mungga hte ( Yawhan 14:6)

⁶ Yesu gaw, Lam gaw ngai rai nga nngai, teng man ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai.

• Karai Kasang a Chyoi Pra ai Wenyi hte daw jau na (Galati 5:16-26)

¹⁶ Da ndai ngai tsun nngai gaw, Wenyi hte hkawm nga mu; shaloi hkum shan a marin ai lam hpe nanhte shadik na myit dai n rai. ¹⁷ Kaning rai nme law, hkum shan gaw Wenyi hte nhtan shai nna marin nga ai; Wenyi mung hkum shan hte nhtan shai nna marin nga ai: nanhte galaw mayu ai n galaw lu myit ga, dai lahkawng gaw shada da nhtan shai hkat nga ma ai. ¹⁸ Dai Wenyi e nanhte hpe lakawn la myit yang gaw, nanhte dai jep ai tara a npu e rai nga myit dai n rai. ^19-21Hkum shan a bungli gaw dan dan leng leng rai nga ai rai nna, dai hte gaw: hpye ai amu, n san n seng ai amu, ngang ai amu, gawng-ngu sumla naw ai lam, Mandan lakle amu, n dawng n yawt ai, ga law ga la ai, manawn masham ai, pawt sindawng ai, shai wa bra wa ai lam, daw hka wa ai lam, hpung karan wa ai lam, nsu nnawn ai, chyaru nang ai, sawse lawklek ai hte bung ai lam rai nga ma ai; shing rai galaw ai ni gaw, Karai Kasang a mungdan a sali wunli hkam la lu na n rai, nga nna shawng e tsun dan ni ai hte maren, ya mung nanhte hpe tsun shadum nga nngai. ^22-23Wenyi a asi chyawm gaw tsaw ra ai kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit nem ai hte tinang myit hpe hkang lu na rai nga ai: dai lam hte hpe hkum lu na tara mi n nga ai. ²⁴ Hkristu Yesu hte seng ai ni chyawm gaw, tinang a hkum shan myit mung, myit kayut ai hte marin marit ai hte nawng, wudang hta jen da ma nu ai. ²⁵ Anhte dai Wenyi hte hkrung nga ga yang gaw, dai Wenyi hte mung hkawm nga ga. ²⁶ Anhte kaman lila grang nga nna, shada da jahte tam ai hte, shada da manawn masham ai, hkum rai nga ga.

• Kawa, Kasha, Chyoi Pra ai Wenyi hta myit hkrum nga na ( Masum raitim Langai) (Shakawn Kungdawn 133:1-3)

Ga Hpungdim:

Yesu gaw Simun Petru hpe “Yawhan a Kasha Simun e, ndai ni tsawra ai hta, nang ngai hpe grau tsawra nni?” ngu san wu ai. Shi gaw, “Rai sa, Madu e, ngai nang hpe teng sha tsaw ra nga nngai gaw, nang chye nga ndai,” ngu nna htan wu ai. Shaloi Yesu gaw, “Nye a sagu kasha ni hpe bau/rem nga u,” ngu nna shi hpe tsun wu ai. (Yawhan 21:15-17)

 ¹⁵ Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsaw ra ai hta, nang ngai hpe grau tsaw ra n ni? ngu nna san wu ai. Shi gaw, Rai sa, Madu e, ngai nang hpe tsaw ra nga nngai gaw, nang chye nga ndai, ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. ¹⁶ Bai lahkawng lang, Yawhan a kasha Simun e, nang ngai hpe tsaw ra nga n ni? ngu nna shi hpe san wu ai. Shi gaw, Rai sa, Madu e, ngai nang hpe tsaw ra nga nngai gaw, nang chye nga ndai, ngu nna bai htan wu ai. Yesu gaw, Nye a sagu ni hpe rem nga u, ngu wu ai. ¹⁷ Bai masum lang, Yawhan a kasha Simun e, nang ngai hpe tsaw ra nga n ni? ngu nna san wu ai. Masum lang du hkra, Nang ngai hpe tsaw ra nga n ni? nga nna shi hpe san wu ai majaw Petru myit yawn nna, Madu e, nang gaw yawng mayawng hpe chye nga ndai; ngai nang hpe tsaw ra nga nngai gaw, nang chye nga ndai, ngu nna, htan wu ai. Yesu gaw, Nye a sagu ni hpe bau nga u.

Dai majaw, anhte hpung woi kanu kawa ni mung nawku hpung (sagu ni) hpe tsawra myit hte myit hkrum mang rum daw jau ap nawng nga ga law. Amen.